រដ្ឋបាលរាជធានីភ្នំពេញគ្រោងនឹងសាងសង់ស្ពានឆ្លងកាត់ទន្លេបាសាក់ចំនួន ២ កន្លែងទៀត ក្នុងពេលដ៏ខ្លីខាងមុខនេះ ដើម្បីដោះស្រាយបញ្ហាចរាចរណ៍ឲ្យមានភាពប្រសើរឡើងវិញនៅលើបណ្ដោយផ្លូវជាតិលេខ២ លេខ៣៦៩ ក៏ដូចជាផ្លូវជាតិលេខ១ និងផ្លូវតភ្ជាប់មួយចំនួនទៀតគឺ ចន្លោះពីស្ពានព្រះមុនីវង្ស និងស្ពានទន្លេបាសាក់ តាខ្មៅ (ស្ពានព្រែកសំរោង)។ នេះបើយោងតាមការបង្ហាញឲ្យដឹងក្នុងកិច្ចប្រជុំមួយជាមួយក្រុមការងារចុះសិក្សាគម្រោងសាងសង់ស្ពានឆ្លងកាត់ទន្លេបាសាក់តភ្ជាប់ពីសង្កាត់ព្រែកប្រា ខណ្ឌច្បារអំពៅ មកសង្កាត់ចាក់អង្រែលើខណ្ឌមានជ័យ រាជធានីភ្នំពេញកាលពីរសៀលថ្ងៃទី០២ ខែមករា ឆ្នាំ២០២០ នៅសាលារាជធានីភ្នំពេញ។
ជាមួយគ្នានេះដែរប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដី រាជធានីភ្នំពេញបានបញ្ជាក់ឲ្យដឹងថា គម្រោងស្ថាបនាស្ពានឆ្លងកាត់ទន្លេបាសាក់ចន្លោះពីស្ពានព្រះមុនីវង្ស និងស្ពានទន្លេបាសាក់ តាខ្មៅ (ស្ពានព្រែកសំរោង) គឺមានចន្លោះពីស្ពានព្រះមុនីវង្ស ទៅស្ពានទន្លេបាសាក់ តាខ្មៅមានប្រវែងប្រមាណ ៧៥៣៨ម៉ែត្រ មានបណ្ដាញផ្លូវមេចំនួនពីរខ្សែសណ្តូកតាមបណ្តោយទន្លេបាសាក់។ ដោយផ្លូវទី១ គឺផ្លូវលេខ៣៦៩ អមផ្នែកខាងកើតទន្លេ ដែលមានទទឹងចន្លោះពី២០ ទៅ៣០ម៉ែត្រ ហើយផ្លូវទី២ គឺផ្លូវជាតិលេខ២ អមផ្នែកខាងលិចទន្លេដែលមានទទឹង៣០ម៉ែត្រ ចាប់ពីស្ថានព្រះមុនីវង្ស ដល់រង្វង់មូល ព្រះនរាយណ៍ មានប្រវែងប្រមាណ៤២៨២ម៉ែត្រ បន្តឆ្លងកាត់ទីក្រុងតាខ្មៅ និងផ្លូវជាតិលេខ២១។
ជាក់ស្ដែងដោយសារតែក្នុងតំបន់នោះជាចរន្តដែលត្រូវធ្វើចរាចរណ៍ឆ្លងកាត់ចូលមកផ្នែកកណ្តាល នៃរាជធានីភ្នំពេញ ដែលបណ្តាលឲ្យចរាចរណ៍កកស្ទះ ដោយសារកំណើនសេដ្ឋកិច្ចទីផ្សារនិងប្រជាពលរដ្ឋ ដូចនេះចាំបាច់ត្រូវធ្វើការអភិវឌ្ឍដោយសិក្សារកដំណោះស្រាយបញ្ហាការកកស្ទះ តាមរយៈការសាងសង់ស្ពានឆ្លងកាត់ទន្លេបាសាក់ និងបណ្ដាញផ្លូវមេសំខាន់ៗមួយចំនួន។ ប៉ុន្តែទោះជាយ៉ាងណាក្ដីនេះគ្រាន់តែជាគម្រោងដែលបាននិងកំពុងសិក្សានូវឡើយទេ មិនទាន់កំណត់ថា នឹងត្រូវសាងសង់នៅពេលណាឲ្យបានច្បាស់លាស់នោះទេ៕ ប្រភព៖ Khmer Note
